လမ်းကြောင်းသစ်တွေဟာ အရင်က တရုတ်နိုင်ငံရဲ့ ရပ်ဝန်းလမ်းကြောင်း အစီအမံ(BRI) ထဲမှာ ပါဝင်ခြင်း မရှိတဲ့ အစီအမံတခု ဖြစ်ပြီး တရုတ်နိုင်ငံရဲ့အနောက်ဘက်က ပြည်နယ်တွေ သမုဒ္ဒရာ ထွက်ပေါက်ရရေး၊ ဒေသတွင်းနိုင်ငံတွေနဲ့ ချိတ်ဆက်ရေးတွေမှာ မြန်မာနိုင်ငံကို ဗဟိုပြုပြီး လည်ပတ်တဲ့ လမ်းကြောင်းတွေ ဖြစ်ပါတယ်။

အာဏာသိမ်းမှုအလွန် ၂၀၂၂ ခုနှစ် အောက်တိုဘာ ၃၁ရက်အထိ တရုတ်-မြန်မာ စီးပွားရေးစင်္ကြံ စီမံကိန်းတွေ အကောင်အထည်ဖော်ဖို့ စီစဥ်ထားတဲ့ ပြည်နယ်နဲ့တိုင်း ရှစ်ခုက မြို့နယ် ၄၃ ခုမှာ တိုက်ပွဲ ပေါင်း ၃၀၁ ကြိမ်ထက်မနည်း ဖြစ်ခဲ့ပါတယ်။

ကွမ်းရှီး-ရန်ကုန် ပင်လယ်ရေကြောင်း ကုန်သွယ်မှုလမ်းသစ်ကို ၂၀၂၂ ခုနှစ် အောက်တိုဘာ ၂၈ ရက်မှာ စဖွင့်ခဲ့ပါတယ်။ ဒီလမ်းသစ်ဟာ တရုတ်နိုင်ငံ ကွမ်ရှီးပြည်နယ်က တောင်တရုတ်ပင်လယ် ဘေ့ဘူး (Beibu) ပင်လယ်ကွေ့ဆိပ်ကမ်းမှာ ရှိနေတဲ့ ချင်းကျိုးဆိပ်ကမ်းကနေ မြန်မာနိုင်ငံ ရန်ကုန် ဆိပ်ကမ်းအကြား တိုက်ရိုက်ချိတ်ဆက်မှာပါ။

အာဏာသိမ်းပြီးနောက်မှာ မြန်မာ-တရုတ် ရေနံပိုက်လိုင်းလုံခြုံရေးကို တရုတ်ဘက်က အလေးပေးပြီး အကြိမ်ကြိမ်ဆွေးနွေးခဲ့ပါတယ်။ ဇူလိုင်လ အစောပိုင်းကလည်း မဲခေါင်-လန်ချန်း ထိပ်သီး အစည်းအဝေးတက်ရောက်ဖို့ မြန်မာနိုင်ငံကိုရောက်နေတဲ့ တရုတ်နိုင်ငံခြားရေးဝန်ကြီး ဝမ်ယိနဲ့ စစ်ကောင်စီနိုင်ငံခြားရေးဝန်ကြီးတို့ တွေ့ဆုံရာမှာ တရုတ်-မြန်မာရေနံပိုက်လိုင်း လုံခြုံရေးကို အာမခံပေးဖို့ ထည့်သွင်းဆွေးနွေးခဲ့ပါတယ်။

မြန်မာနိုင်ငံမှာ အကောင်အထည်ဖော်ဖို့စီစဥ်နေတဲ့ တရုတ်စီးပွားရေးစင်္ကြံစီမံကိန်းတွေထဲက မဟာဗျူဟာကျတဲ့ စီမံကိန်းတွေဟာ လက်နက်ကိုင် ပဋိပက္ခတွေ ဖြစ်ပွားနေတဲ့ တိုင်းရင်းသားဒေသတွေမှာ  အများဆုံး ရှိနေပါတယ်။ အာဏာသိမ်းပြီးနောက်ပိုင်းမှာ စစ်ကောင်စီနဲ့ တိုင်းရင်းသား လက်နက်ကိုင်တွေကြား တိုက်ပွဲတွေတင် ပိုများလာတာမဟုတ်ဘဲ အသစ်ပေါ်ပေါက်လာတဲ့ ဒေသခံကာကွယ်ရေးတပ်တွေနဲ့ စစ်ကောင်စီအကြား တိုက်ပွဲတွေကြောင့် ပဋိပက္ခမြေပုံက ကျယ်ပြန့်လာပါတယ်။

မြန်မာနိုင်ငံအတွင်း တရုတ်စီးပွားရေးစင်္ကြံစီမံကိန်းတွေထဲက မဟာဗျူဟာကျတဲ့ စီမံကိန်းတွေဟာ အာဏာသိမ်းမှု မဖြစ်ခင်အချိန်ကတည်းက လက်နက်ကိုင် ပဋိပက္ခ ဖြစ်ပွားနေတဲ့ တိုင်းရင်းသားဒေသတွေမှာ အများဆုံး ရှိနေပါတယ်။