မြန်မာ-ထိုင်းနယ်စပ်မျဥ်း သုံးပုံတပုံကို KNU ထိန်းချုပ်

Photo – AFP

ကရင်ပြည်နယ် မြဝတီမြို့နယ်ထဲက ဥကရစ်ထစခန်းကို သိမ်းယူပြီးတဲ့နောက် မြန်မာ-ထိုင်းနယ်စပ်မျဥ်းတလျှောက်လုံးမှာ ကရင်အမျိုးသားအစည်းအရုံး (KNU) ရဲ့ ထိန်းချုပ်နိုင်မှုဟာ နယ်စပ်မျဥ်းတခုလုံးရဲ့ သုံးပုံတပုံခန့်¹ ကျယ်ပြန့်သွားပါပြီ။ မြဝတီမြို့နဲ့ မိုင် ၃၀ သာဝေးပြီး နယ်စပ်မျဥ်းအနီးမှာရှိတဲ့ ဥကရစ်ထစခန်းကို ဇူလိုင် ၁၂ ရက်မှာ KNU/KNLA နဲ့ ပူးပေါင်းတပ်တွေက သိမ်းယူခဲ့တာပါ။ ဒီစခန်းဟာ နယ်စပ်စည်းလုံခြုံရေးအတွက် ဗျူဟာမြောက်အရေးပါသလို ထိုင်းနိုင်ငံ တာ့ခ်ခရိုင်နဲ့ နယ်နိမိတ်ချင်း ထိစပ်နေပါတယ်။ မြန်မာ-ထိုင်းနယ်စပ် နယ်နိမိတ်အရှည်ဟာ ၂,၄၁၆ ကီလိုမီတာရှိပြီး လက်ရှိမှာ KNU က နယ်စပ်မျဉ်းရဲ့ ကီလိုမီတာ ၈၀၀ နီးပါးကို ထိန်းချုပ်လိုက်တာ ဖြစ်ပါတယ်။

၂၀၂၁ ခုနှစ် စစ်အာဏာသိမ်းမှုအလွန် KNU ရဲ့ စစ်ဆင်ရေးအများစုဟာ ပြည်မဘက်ကို တိုးချဲ့ထိန်းချုပ်နိုင်ဖို့ထက် မြန်မာ-ထိုင်းနယ်စပ်မျဉ်းဘက် ဆန့်ထုတ်ထိန်းချုပ်နိုင်ရေးကိုပဲ အလေးပေးဦးတည်ခဲ့တာ တွေ့ရပါတယ်။ လက်နက်ကိုင်တော်လှန်ရေးတပ်ဖွဲ့တွေအတွက် နယ်စပ်မျဥ်းနဲ့ နယ်စပ်ဒေသထိန်းချုပ်မှုက နယ်မြေတည်ဆောက်နိုင်ဖို့၊ အရင်းအမြစ်စုစည်းတည်ဆောက်နိုင်ဖို့၊ ဒေသတွင်း နယ်စပ်ကုန်သွယ်စီးပွားနဲ့ နှစ်နိုင်ငံနယ်စပ်လုံခြုံရေးတွေမှာ အရေးပါမှုကို မြှင့်တင်နိုင်ဖို့ဆိုတဲ့ အခန်းကဏ္ဍသုံးရပ်လုံးအတွက် အခရာကျပါတယ်။

KNU အနေနဲ့ နယ်စပ်မျဥ်းတလျှောက် ထိန်းချုပ်နယ်မြေ ကျယ်ပြန့်လာတာဟာ ကရင့်တော်လှန်ရေးမှာ သူ့ရဲ့ နိုင်ငံရေး၊ နယ်မြေပိုင်ဆိုင်မှုနဲ့ အုပ်ချုပ်ရေးအာဏာကို ချဲ့ထွင်လာနိုင်တာ ဖြစ်ပါတယ်။ ဥကရစ်ထစခန်းနယ်မြေဟာ ဒီမိုကရေစီအကျိုးပြုကရင်တပ်မတော် (DKBA) စစ်ဌာနချုပ်နယ်မြေနဲ့ တဆက်တစပ်တည်း ရှိနေတာကြောင့် အခုအခါ DKBA ရဲ့ နယ်မြေကျဉ်းသွားပြီဖြစ်ပါတယ်။ KNU အတွက် ရိက္ခာကအစ လက်နက်ခဲယမ်းအဆုံး အခြေခံကျတဲ့ ကုန်စည်တွေ သွင်းယူနိုင်ဖို့ လမ်းကြောင်းတွေ ပွင့်သွားတာလည်း ဖြစ်ပါတယ်။ KNU အနေနဲ့ နယ်စပ်ကုန်သွယ်ရေးလမ်းတွေနဲ့ စခန်းတွေကို အပြည့်အဝ ထိန်းချုပ်နိုင်ဖို့အထိ အားစိုက်လာနိုင်ခြေ ရှိပါတယ်။