စစ်ခေါင်းဆောင်၏ တရုတ်နိုင်ငံခရီးစဉ်တွင် ပွဲထုတ်ခံခဲ့ရသော စစ်တပ်၏ စတုတ္ထမျိုးဆက်သုံးဦး

Photo – AFP

▪️ကာလ (Period)

၂၀၂၅ ခုနှစ် သြဂုတ် ၃၀ မှ ၂၀၂၅ ခုနှစ် စက်တင်ဘာ ၆ ရက်။

▪️သက်ဆိုင်သူများ (Stakeholders)

စစ်ခေါင်းဆောင်နှင့်အတူ တရုတ်နိုင်ငံခရီးစဉ် လိုက်ပါသွားသော စစ်ဘက်ဆိုင်ရာအရာရှိများ။

▪️ဖြစ်စဉ်အကျဉ်း (Issues/activity)

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် တရုတ်နိုင်ငံသို့ သွားရောက်ခဲ့ပြီး တရုတ်သမ္မတအပါအဝင် နိုင်ငံတကာခေါင်းဆောင်တချို့နှင့် တွေ့ဆုံခဲ့သည်။ ၎င်းနှင့်အတူ ဗိုလ်ချုပ်ကြီး ရဲဝင်းဦး (OTS-77)၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး ကျော်စွာလင်း (DSA-35)၊ ဗိုလ်ချုပ် မိုးမြင့်ဆွေ (OTC-23)၊ ဗိုလ်ချုပ် ဇော်မင်းထွန်း (DSA-37)နှင့် ဒုတိ​ယဗိုလ်မှူးကြီး ကျော်ဇောရဲ (DSA-47) တို့လည်း ပါခဲ့သည်။

▪️အခြေအနေ ဦးတည်ချက် (Status/trends)

ထိုသူများအနက် ဗိုလ်ချုပ်ကြီး ကျော်စွာလင်းသည် နောင်တွင် ကာကွယ်ရေးဦးစီးချုပ်ဖြစ်ရန် ရေပန်းစားသူဖြစ်သည်။ ဗိုလ်ချုပ် မိုးမြင့်ဆွေမှာ ကိုယ်ရံတော်ဗိုလ်ချုပ်ဖြစ်ပြီး ဒုတိယဗိုလ်မှူးကြီး ကျော်ဇောရဲသည် စစ်ခေါင်းဆောင်၏ အနီးကပ်အကြံပေးတဦးဖြစ်သည်။ ISP-Myanmar ၏ သုတေသနပြုလေ့လာချက်များအရ ထိုသုံးဦးမှာ စစ်တပ်၏ စတုတ္ထမျိုးဆက် ထိပ်တန်းအရာရှိများ ဖြစ်လာနိုင်သည် (ISP On Point အမှတ်-၂၇ ကိုရှုပါ)။ ၎င်းတို့အား တရုတ်နိုင်ငံသို့ခေါ်သွားပြီး တရုတ်ခေါင်းဆောင်များနှင့် တွေ့ဆုံချိန်၌ ပွဲထုတ်ခဲ့ခြင်းကို ‘ဆွေပြမျိုးပြ’ မိတ်ဆက်ပေးခြင်းသဘောဟု သုံးသပ်နိုင်သည်။ အတိတ်တွင်လည်း စစ်ခေါင်းဆောင် ဗိုလ်ချုပ်မှူးကြီး သန်းရွှေသည် ရာထူးမစွန့်ခင် ၂၀၁၀ ပြည့်နှစ် စက်တင်ဘာလအတွင်း တရုတ်နိုင်ငံသို့သွားချိန်၌ ၎င်းနေရာဆက်ခံမည့် (စစ်တပ်၏ တတိယမျိုးဆက်) ထိုအချိန်က ဒုတိယဗိုလ်ချုပ်ကြီး မင်းအောင်လှိုင်ကို ဗိုလ်ချုပ်ကြီး ရွှေမန်း၊ ဗိုလ်ချုပ်ကြီး တင်အောင်မြင့်ဦးတို့နှင့်အတူ ခေါ်သွားပြီး တရုတ်ခေါင်းဆောင်များနှင့် မိတ်ဆက်ပေးခဲ့သည်။

▪️သက်ရောက်နိုင်ခြေ (Implications)

တရုတ်ခေါင်းဆောင်များနှင့် တွေ့ဆုံခြင်းကဲ့သို့သော အရေးကြီးခရီးစဉ်တွင် ၎င်းနှင့် အပတ်စဉ်များစွာ ကွာဟသူများကို စစ်ခေါင်းဆောင်က ခေါ်သွားခြင်းဖြစ်သည်။ ရွေးကောက်ပွဲအလွန်တွင် စစ်ခေါင်းဆောင်က တပ်ချုပ်ရာထူးကို မစွန့်လျှင်ပင် ဗိုလ်ချုပ်ကြီး ကျော်စွာလင်း ဦးဆောင်သော ‘စတုတ္ထမျိုးဆက် တပ်မတော်’အရာရှိများ၏ လုပ်ပိုင်ခွင့်နှင့် အခန်းကဏ္ဍမှာ ကျယ်ပြန့်လာနိုင်ခြေရှိသည်။

▪️ဆီလျော်မှု (Relevance)

ISP On Point အမှတ်-၂၇ တွင် ဖော်ပြခဲ့သည့်အတိုင်း တရုတ်နှင့် အိမ်နီးချင်းနိုင်ငံတချို့၏ ကျားကန်မှုကို ရထားသော စစ်တပ်ကို မကြာမတင်အချိန်၌ စစ်ရေးအရ ပြိုအောင်မဖြိုနိုင်ပါက (တော်လှန်စစ်သည် ရေရှည်စစ်အဖြစ် ထပ်တခါ ဇာတ်မျောပြီဆိုပါက)  မြန်မာ့နိုင်ငံရေးအပြောင်းအလဲသည် စစ်တပ်တွင်း ပြုပြင်ပြောင်းလဲရေး ဖြစ်၊ မဖြစ်နှင့် တိုက်ရိုက်ဆက်စပ်လာနိုင်သည်။ စစ်တပ်၏ စတုတ္ထမျိုးဆက် အပြောင်းအလဲကို လေ့လာခြင်းအားဖြင့် နေပြည်တော်၏ အာဏာအရွေ့ကို လွှမ်းမိုးနိုင်မည့် မဟာဗျူဟာများကိုလည်း ဖော်ထုတ်နိုင်မည်ဖြစ်သည်။