တရုတ်နိုင်ငံကို မြေရှားတင်သွင်းတဲ့နိုင်ငံတွေထဲ မြန်မာနိုင်ငံက ထိပ်တန်းစာရင်းမှာ ဆက်ပြီး ရပ်တည်နေပါတယ်။ တရုတ်နိုင်ငံကို နိုင်ငံတကာကနေ တင်သွင်းတဲ့ မြေရှားသတ္တုတွေထဲက တဝက်ကျော်ဟာ မြန်မာနိုင်ငံက ဖြစ်ပါတယ်။

မြန်မာနဲ့ တရုတ် နှစ်နိုင်ငံအကြား ကုန်သွယ်မှုတန်ဖိုးဖော်ပြချက် ကွာဟမှုဟာ ဘဏ္ဍာနှစ် ရှစ်နှစ်အတွင်း အမေရိကန်ဒေါ်လာ ၆၃ ဘီလီယံကျော်အထိ ရှိပါတယ်။ ဒါက တနိုင်ငံချင်းစီက ထုတ်ပြန်တဲ့ ကုန်သွယ်မှု စုစုပေါင်းတန်ဖိုးတွေကို နှိုင်းယှဉ်ကြည့်ရာကနေ ပေါ်ထွက်လာတဲ့ ကိန်းဂဏန်း ဖြစ်ပါတယ်။ ဒီအထဲက ၄၅ ဘီလီယံကျော်ကကတော့ ၂၀၂၁ ခုနှစ် စစ်အာဏာသိမ်းပြီးနောက်ပိုင်း ပမာဏပါ။ ဒီလိုကွာဟနေတာဟာ အာဏာသိမ်းမှုအလွန် တရုတ်နိုင်ငံကို မြေရှားသတ္တုတင်ပို့မှုတွေ မြင့်တက်လာတာ၊ လက်နက်ကိုင်အဖွဲ့တွေရဲ့ နယ်စပ်ထိန်းချုပ်မှု ကျယ်ပြန့်လာတာ၊ တရားမဝင် စီးပွားရေးကြီးထွားလာတာ ဒါတွေနဲ့လည်း ဆက်စပ်နေနိုင်ပါတယ်။

စစ်ခေါင်းဆောင်ရဲ့ တရုတ်ခရီးစဉ်အပြီး မကြာခင်မှာပဲ စစ်ကော်မရှင်အဖွဲ့ဝင် ကိုးဦး တရုတ်နိုင်ငံကို သီးခြားစီ သွားခဲ့ကြပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ရဲ့ တရုတ်ခရီးစဉ်မှာ မြန်မာ-တရုတ် နှစ်နိုင်ငံအကြား ပူးပေါင်းဆောင်ရွက်မှုအတွက် နားလည်မှုစာချွန်လွှာ ခုနစ်ခုကို လက်မှတ်ထိုးခဲ့ကြပါတယ်။ ဒါက စစ်ရေးပဋိပက္ခ ပြင်းထန်နေဆဲဖြစ်တဲ့ မြန်မာနိုင်ငံမှာ စစ်ကော်မရှင်ကို တရုတ်အစိုးရက မက်လုံးပေး ထောက်ခံနေတဲ့အကြောင်း ပိုပြီး ထင်ရှားလာတာပါ။