ခေတ်စနစ်ကို ပြောင်းလဲမယ့် အားထုတ်မှုတိုင်းမှာစိတ်ကူးစိတ်သန်းသစ်၊ အစီအစဉ် ဆန်းစစ်မှုတွေကို လိုအပ်နေ၊ တောင်းဆိုနေတာမို့ “ISP ကပြင်ရပ်ဝန်း” ကို စတင်လိုက်ပါတယ်။ ယခင်ကာလ ISP-Myanmar ရဲ့ အစီအစဉ်တခုဖြစ်တဲ့ “ယောမင်းကြီးဇရပ်”လို စကားဝိုင်း ဆွေးနွေးပွဲတွေကနေ အချေအတင် ဆွေးနွေးဖလှယ်မှုတွေ၊ မူဝါဒ အကြံပြုချက်တွေ ​ဖော်ထုတ်နိုင်ခဲ့ကြသလို အခြေအနေ အချိန်အခါ အပြောင်းအလဲရဲ့ လိုအပ်ချက်အရ အခု အသစ် တင်ဆက်မယ့် “ISP ကပြင်ရပ်ဝန်း” ကနေ ပိုမို ကြွယ်၀ စုံလင်တဲ့၊ လွတ်လပ် လုံခြုံတဲ့ “ကပြင်စကားဝိုင်း”၊ “ကပြင်ရပိုင်ခွင့်”နဲ့ “ကပြင်သင်တန်း” တွေကို ရရှိနိုင်ကြမှာပါ။

မြန်မာပညာရှင် ဆရာမြဇင်ရဲ့ လေ့လာချက် အဆိုကို ကိုးကားရရင် ဇရပ်ဆိုတာ “မြန်မာ့ ယဉ်ကျေးမှု၏ ရွာပြင် ယဉ်ကျေးမှု သင်္ကေတ” ဖြစ်ပြီး လွတ်လပ်မှု၊ ချိတ်ဆက်မှုနဲ့ ကူးလူးဖလှယ်မှုကို အားပေးပါတယ်။ ကပြင် ဆိုတာကတော့ “ရွာတွင်း ယဉ်ကျေးမှု ပစ္စည်း၊ ယဉ်ကျေးမှု သင်္ကေတ တရပ် ဖြစ်တယ်”လို့ ဆရာမြဇင်က ဆိုပါတယ်။ “ကပြင်သည် ရပ်ရွာ ကိစ္စ၊ လူမှုဆက်ဆံရေး ကိစ္စ၊ စီးပွားရေး ကိစ္စ၊ ဘာသာရေး ကိစ္စ၊ သတင်းဖလှယ်ရေး ကိစ္စ စသည့် ကိစ္စများ၏ လုပ်ငန်း ဌာနခွဲ တခုဟု ဆိုနိုင်သည်” လို့ ဆရာ မြဇင်က ဖွင့်ဆိုပါတယ်။

ISP ကပြင်ရပ်ဝန်းဟာ ISP-Myanmar ဆိုတဲ့ အိမ်မကြီးကနေ အမိုးအကာ တဆက်တည်း ထုတ်ထားတဲ့ အိမ်ကပြင် တခု ဖြစ်ပါတယ်။ လွတ်လပ်စွာ ဖိတ်ခေါ်တဲ့ ရပ်ဝန်း တခု၊ ဆုံစည်း ဆွေးနွေး ဖလှယ်စရာ ဌာနေ တခုပါပဲ။ တိုင်းရေး ပြည်ရေး နိုင်ငံရေးတော့ စိတ်ဝင်စားတယ်၊ ဆိုရှယ် မီဒီယာက အချက်အလက်တွေကို မယုံတာ များပြီ၊ စိတ်ပျက်နေပြီ ဆိုရင် ISP ကပြင်ရပ်ဝန်းမှာ ဝင်ပါပြီး သိချင်တာ၊ လေ့လာချင်တာတွေကို လာပြောလှဲ့ပါ။ ယဉ်ကျေး ရင့်ကျက်တဲ့ သဘောထား ကွဲလွဲမှု၊ အချေအတင် ဆွေးနွေးမှုတွေမှာ ဝင်ပါလှဲ့ပါလို့ ဖိတ်ခေါ်ပါတယ်။