နိုင်ငံရေးစကားဝိုင်းတွေမဆိုထားနဲ့ လူမှုဆက်ဆံရေးတွေ၊ စကားဝိုင်းနဲ့ ဆွေးနွေးပွဲတွေ၊ ပဋိပက္ခဖြေရှင်းတာတွေမှာလည်း သည်းခံမှုတွေ လျော့နည်းလာကြတာ၊ နားလည်ပေးနိုင်မှု နည်းပါးလာကြတာ၊ စိတ်တိုလွယ်၊ စိတ်ဆတ်လွယ်လာကြတာ စတဲ့ စိတ်ပိုင်းဆိုင်ရာဖိအားတွေ များပြားလာတာရဲ့ နောက်ဆက်တွဲအခြေအနေတွေ ခံစားနေကြရတာကို ပေါပေါများများ တွေ့မြင်လာရပါတယ်။

အဆင့်အတန်းနိမ့်တဲ့ ဖော်ပြမှုတွေကို ကောင်းပါတယ်၊ တော်ပါတယ်၊ ရယ်ရပါတယ်လို့ ထင်နေသေးတဲ့သူတွေ ရှိသေးတာကိုလည်း မမေ့ပါနဲ့။ သူတို့ကို ရှုတ်ချအပြစ်တင်မဲ့အစား ကျမတို့အနေနဲ့ လက်လှမ်းမီသလောက် အသိပညာလည်း ပေးသင့်သလို တဖက်ကလည်း ဒီလို အရည်အသွေးနိမ့်တဲ့ ဖန်တီးမှုတွေ ရပ်တန့်အောင်လို့ ဝိုင်းဝန်း ကြိုးပမ်းကြရပါမယ်။